Por Jorge Marqueta Escuer
http://zaragozaciudad.net/omixin
Oficialment, si leyemos as notas de prensa d’a Delegación de Cultura d’o Concello de Zaragoza en os zaguers anyos, ista cifra ye, manimenos, de 300.000-400.000 oferents.
Si la cursa ye d’uns 1.000 metros lineals (a de totas as anyadas y la d’ista anyada, anque por atro puesto).
Si l’ofrenda empecipia á las 7:30 horas y las primeras flors plegan á los pietz d’a Virchen d’o Pilar sobre las 8:15 horas y remata á las 18.30-18:45 horas, cuan plegan as zagueras flors (entorrumpiéndose á las 12:00 horas durante meya hora, cuan l’Alcalde y bels concellers d’o PSOE y d’o PP, trafucando Estau e Ilesia, creyencias particulars y publicas y fendo mofla de l’aconfesionalidat de l’Estau amanixen por allí dimpués de salir de misa pontifical), podemos decir que dende que se ofreix a primera flor dica la zaguera transcurren 10 horas, isto fa 600 minutos, u lo que ye lo mismo: 36.000 segundos. Con as cifras oficials d’oferents (350.000) pasarban cada segundo debant d’a Virchen una meya de 9’72 presonas, u lo que ye lo mismo: ¡¡¡583 presonas por minuto!!!!. Isto ye materialment imposible (antimás, bells s’entretienen con dances y cantas).
A cifra ye extraordinariament rinchada. Dexaserando poderbamos aceptar una meya de una persona por segundo, o que fa una participación de ¡¡36.000 presonas!!. Diez vegadas menos que los datos oficials.
Se charra de “más de 10 millons de flors”. Dixándo-lo en 10.000.000 flors y contando con 36.000 partecipants, cadagún portarba quasi ¡¡¡278 flors!!!. Isto fa que una familia de cuatro miembros (con dos menors) portarban á los pietz d’a Virchen ¡¡¡1.111 flors!!!. Y un grupo de 10 miembros, 2.780 flors.
Iste anyo bi-han partecipau 442 grupos (y solo se puede participar-ie en grupo); isto fa que, si las cifras que se dan estasen ciertas (remeremos: 300.000-400.000 oferents), cada grupo partecipant estarba compuesto de una meya de 679-905 presonas por grupo. A devoción á la Virchen d’o Pilar, dende lugo y veyendo istos datos, no tiene limites.
O se fa un miraglo anyal, o se dexaseran as cifras. Á la lux d’a Razón, estoi que ye lo segundo.
