Por Silvia Cebolla Civil
Berolla yera una moceta que como o suyo propio nombre diz, poseyeba una gran polideza. Yera una mesacha choven, de lo que se diz en edat casadera, que viviba en un chicot lugaron con o suyo pai, que treballaba con a ferralla. A Berolla, le feba a-saber-lo de goyo leyer.
Por ixo os mesaches d’o lugar no se la miraban con buenos uellos, porque no les feba goyo enfrontinar-se con una muller que sabese más que no ells. Con tot y con ixo, siempre le yeran fotendo pedretas y teneba buena cosa de pretendients. Ya que como ye de dar, lo que más valuraban en una muller yera a suya polideza, y d’ixo berolla en teneba prou.
Aman d’iste lugarichon bi heba un castiello, an que viviba o principe d’aquellas tierras, que siempre vestiba d’azul. Un buen diya una muller que poseyeba as piors desgracias que puede tener una muller, estar viella y fiera de tot, fació una vesita a o principe que vestiba d’azul. A muller le demando aduya porque s’heba cacegau por o bosque y no teneba puesto ta dormir ixa nueit. O principe que yera un fachendoso y un balloquero le dicio que encara que o castiello yera grandizo de tot, no teneba garra cambra ta una muller viella y fiera como ella. A muller, de bote y bolello se torno polida y prencipio a romanciar unas parolas rarizas, en ixe inte, o principe se quedó sin sangre en a pocha porque paro cuenta de que a viella yera una bruixa. Ista facio un incante a o principe y a o castiello, incluyindo tamien a todas personas d’o servicio que treballaban ta éll. Covertindo asinas a o principe en bestia y a la resta de personas en trastes d’a casa como en baixilla, candelero,coixins, asinas-asinas.
D’atra man, tiempo dimpues d’istos feitos, Berolla decidió de pasar a tardi fendo una gambadeta por o bosque, y quan se canso se posó en a mosquera d’un arbol ta leyer un ratichon. Yera tan enchugardida con o suyo libro, que no paro cuenta de yera fendo tarde dica que le prencipioron a fer vergonya os uellos por os zaguers rayos de sol d’o cayent d’a tardi. Miró de trobar o camin ta tornar ta casa, pero tot paso de estar lusco-lusco a tornarse fosco de tot. Yera solenca en o bosque en o preto d’a nueit y ta forro y bota de luen veyó como unos lupos veniban cara ta ella. Petró a correr a las cuatro suelas ta eslampar d’ells a tot trance, dica que plego en una cleta prou altera. Dezaga d’ella amanexio una bestia que yera tan fieriza que espanto a os lupos, que marchoron sin tartir. A bestia pillo a Berolla d’a cintura de malas trazas y ista prencipio a chilar y a meter-le golpes y muesos a desembrarro. A bestia la fico en o suyo castiello y le dicio que la habría de quedar-se encerrada astí dica que éll querese. Berolla prebo d’eslampar muitas vegadas pero a cleta d’o castiello yera masiau altera y encara que estase a retepelo habió de fer-se-ie a la vida en o castiello.
Tanimientres en o lugar de Berolla yeran totz muito alticamaus con a suya desaparición. O suyo pai yera triste de tot porque no la trobaban por garra cabo, y ta que os zagals d’o lugar no dixasen d’escar-la, ufrió en matrimonio a la suya filla a qui la trobase.
Por atro costau, en o castiello, a bestia prebaba de conquistar a Berolla ta que se casase con éll, porque yera l’unica traza de desfer l’incante d’a bruixa. Miraba de fer-la venir a plego decindo-le que en realidat yera un mesache muito pincho, y que si se casaba con éll tendría una vida de cuento de fadas. Porque la plenaría de luixos, alfayas y vestius, antimás como teneban servicio no habría d’encargarse de escoscar o castiello, nomás de cudiar a os ninos, cocinar de cabo ta quan y estar disposada ta éll en qualsiquier inte. Prou que Berolla no quereba ixa vida ta ella porque teneba atrás anglucias que no teneban cosa a veyer con casar-se con un principe que vestise d’azul u tener fillos. Ella quereba estar incheniera naval ta poder fer barcos y asinas dimpues poder viachar por totz os oceanos y fer una uelladeta a totz os cantons d’o mundo. Pero tanimientres como yera engarcholada a retepelo en ixe castiello aprofeitaba todas as nueis, mientres a bestia dormiba a garrón caito, ta leyer libros d’incheneria naval en a grandiza biblioteca. Todas as nueis l’acompanyaba en a biblioteca una moceta que por culpa de l’incante se heba convertiu en una tetera. Dende que se conoixieron facioron muita pacha y s’aconortaban l’una a l’atra por estar engarcholadas en una gavia de cristal. Una nueit que yeran charrín-charrant acofladas en o sofá d’a biblioteca, Berolla se la miró fito-fito a os uellos mientres l’amorosiaba os pells, as suyas ninetas espurniaban, y le dicio a calzón tirau: “me fas goyo”. Tetera en primerías se quedo enlucernada porque no creyeba que le podese fer goyo a garra persona con ixas farchas de tetera. Pero paro cuenta de que a Berolla ixo rai, y le contesto que a ella tambien le feba goyo y que cada vegada que charraban d’os viaches que quereban fer por o mundo se prexinaba que los feban chuntas. Le dició que la veyeba como bella cosa más que una amiga, la veyeba como a companyera d’a suya vida. Dende ixe diya prencipioron a vivir o suyo aimor dezaga d’os uellos de bestia que continaba caten con que Berolla se casase con éll.
Ent’o lugar de Berolla plegó o chiflete de que bestia la teneba engarcholada en o suyo castiello asinas que ixa mesma nueit salioron totz os zagalons d’o lugar a tot trance, cara t’alla con forcas, tochos y fayetas.
Ixa nueit bestia se dispertó sorrontau por una baruca y deshorau s’endrezo ta la biblioteca an que se trobo a Berolla con a tetera charrando a escuchetes y fendo-se pochons. Se metió furo de tot y se concaró con ellas y quan yeran zarpa a la grenya ascuitoron un estrapalucio difuera d’o castiello. Yeran os cerenyos zagalons d’o lugar blincando a cleta y encarretandose enta as finestras d’a biblioteca. Creboron os beires y dentroron con a intención de salvar a Berolla y asinas casar-se con ella. Berolla y tetera, que de miedo, no en teneban mica, se metieron debant de totz y se facioron besos en os morros. Totz se quedaron sin sangre en a pocha y ellas explanicaron que no se quereban casar con dengún, que no quereban estar engarcholadas y que teneban atros plans ta la suya vida. Como totz veyoron que debant d’ixos feitos no teneban cosa a fer las dixoron marchar. Berolla y Tetera marchoron en barco por o mundo y de cabo quan ninviaban una postal contando as suyas aventuras t’aduyar a los zagalons d’o suyo lugar a ubrir os suyos esmos. A la fin o diya que decidioron de tornar t’o lugar veyoron que as cosas, gracias a la suya valentía, heban cambiu a-saber-lo. As mullers ya no yeran as que s’encargaban de tot d’a casa sino que lo feban totz de conchuta y que mesmo bestia viviba en o castiello con un zagalet d’o lugar. Asinas que cuento contau por a chaminera s’ha escapau.
